बुटवल/ सामुदायिक वनको संरक्षणमा समुदायको अतुलनीय योगदान भए पनि अव्यवहारिक ऐन कानुनका कारण वन व्यवस्थापन जटिल बनेको गुनासो सरोकारवालाहरूले गरेका छन् ।
बुटवल सामुदायिक वन उपभोक्ता समूहको १९ औँ वार्षिक साधारण सभामा वक्ताहरूले वनबाट समुदायले यथोचित लाभ लिन नपाएकोमा असन्तुष्टि व्यक्त गरेका हुन । सामुदायिक वनको ढलापडा काठ समेत सदुपयोग गर्न नपाउँदा ठूलो मात्रामा वन पैदावार खेर गइरहेको उनीहरूको भनाइ छ ।
कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेले वनका ऐन नियमहरू व्यवहारिक नभएको स्पष्ट पार्नुभयो। उहाँले बुटवलको ऐतिहासिक र पुरातात्विक महत्व बोकेको यस वनको संरक्षणमा नगरपालिकाले विशेष ध्यान दिएको बताउनुभयो । सामुदायिक वन र उपभोक्ताको हितमा सघाउन उपमहानगर तयार रहेको उहाँको भनाइ छ ।
सामुदायिक वन उपभोक्ता महासंघका केन्द्रीय सदस्य दिनानाथ आचार्यले सुकेका र ढलापडा रुखहरू समेत समयमै व्यवस्थापन गर्न नपाउँदा काठ–दाउरा कुहिएर खेर गइरहेको तथा यसले समुदायलाई लाभबाट वञ्चित गरेको बताउनुभयो ।
बुटवल सामुदायिक वनका अध्यक्ष बावुराम पौडेलले वन संरक्षणमा सबैको सहयोगको आवश्यकता औंल्याउँदै वनको विकासले बुटवल शहरलाई स्वच्छ, हराभरा र रमणीय बनाउनमा महत्वपूर्ण भूमिका खेल्ने बताउनुभयो।
साधारण सभाले अध्यक्षको प्रगति प्रतिवेदन, कोषाध्यक्षको प्रतिवेदन र लेखा परीक्षण प्रतिवेदनलाई सुझावसहित सर्वसहमतिले पारित गरेको छ।
कार्यक्रममा बुटवल उपमहानगरपालिका वडा नं. १ का अध्यक्ष नरेन्द्र बस्नेत, २ का सुनिल शाक्य, अशोक राई, गौतमलाल शाक्य, सब डिभिजन सैनामैनाका कार्यालय रेन्जर प्रकास भट्टराई लगायत १५० भन्दा बढी उपभोक्ताहरूको उपस्थिति थियो ।
