काठमाडौं। सामुदायिक वन उपभोक्ता महासंघ फेकोफनका अध्यक्ष भारती पाठकले देशभरका एक करोड उपभोक्ता आन्दोलनमा उत्रिने चेतावनी दिनुभयो । सामुदायिक वन र उपभोक्ता अधिकारका लागि आन्दोलन जारी राख्ने बताउँदै अध्यक्ष पाठकले बिहिबारदेखि देशभर आन्दोलन कायमै रहने चेतावनी दिनुभयो ।
मंगलबार भएको आन्दोलनमा धरपकड प्रति आपत्ति जनाउँदै उहाँले सरकारले उपभोक्ताका अधिकार खोस्ने निति बन्द नगरेसम्म आन्दोलन जारी रहने बताउनुभयो । अध्यक्ष पाठकले बन्द कोठामा बसेर सरकारले बनाएका निती उपभोक्ताले नमान्ने घोषणा गर्नुभयो ।
सरकारसँग माग गरेको बिषयमा आफूहरुले लचकता अपनाए पनि सरकारले उपभोक्ताका अधिकार रक्षाका लागि समस्या समाधानका लागि पहल नगरेको पाठकले बताउनुभयो ।
सरकारले लिखित रूपमा कमजोरी सच्याउँदै कानुन फिर्ता नलिए सम्म आन्दोलन नरोकिने बताउँदै अध्यक्ष पाठकले २८ गते सम्म सबै जिल्लामा प्रशासन कार्यालय घेराउ गरिने बताउनुभयो । कोभिड मापदण्ड अनुसार २५ जना मात्रै आन्दोलनमा सहभागी भएको उहाँको भनाइ थियो ।
पत्रकार सम्मेलनमा पारिवारिक नीजि वन नेपालका अध्यक्ष जोगराज गिरीले वन अधिकारका पक्षमा भएको आन्दोलनमा गरिएको हस्तक्षेपप्रति आपत्ति जनाउनुभयो।
गैसस महासंघका प्रतिनिधिले फेकोफनको आन्दोलनमा सक्रिय समर्थन गर्ने बताउनुभयो ।
सामुदायिक विद्युत उपभोक्ता महासंघ का अध्यक्ष नारायण ज्ञवालीले समुदाय बलियो हुंदा राज्यको टाउको दुखेको भन्दै वन उपभोक्ताको अधिकार रक्षाका लागि भएको आन्दोलनमा हस्तक्षेप हनु आपत्तिजनक रहेको बताउनुभयो । उहाँले सरकारले माफी माग्नुपर्ने पनि बताउनुभयो।
कार्यक्रममा फेकोफनका महासचिव बीर्खबहादुर शाही, सचिव ठाकुर भण्डारी लगायतका वक्ताहरुले मानव अधिकार रक्षाका लागी मानवअधिकार आयोगको पनि ध्यानाकर्षण गराएका थिए । हिजो प्रहरी नियन्त्रणमा मुक्त भएपछि फेकोफनले आज पत्रकार सम्मेलन गरेर धारणा राखेको हो ।
